5 қыркүйек – қазақ тіл білімі мен әдебиеттану ғылымдарының негізін салушы, ұлт ұстазы Ахмет Байтұрсынұлының туған күнімен орайластырылған Қазақстан халқы тілдерінің күні мерекесі Cыр өңірінде жоғары деңгейде аталып өтті.
«Тіл – татулық тірегі» атты облыстық фестиваль «Ұлттың сақталуына да, жоғалуына да себеп болатын нәрсенің қуаттысы — тіл» деп ұлағатты сөз қалдырған, Алаш арысы Ахмет Байтұрсынұлы жайлы мазмұнды бейнероликпен басталып, әрі қарай «Ахмет Байтұрсынұлының монологы» атты арнайы әзірленген прологпен жалғасты.
құттықтау сөз сөйлеп, облыстағы бірқатар тіл жанашырлары мен сала мамандарын облыстың Құрмет грамотасымен, облыс әкімінің, ҚР Ғылым және жоғары білім министрінің, Тіл саясаты комитетінің Алғыс хаттарымен марапаттады.
Бұдан соң Халықаралық «Қазақ тілі» қоғамы қоғамдық бірлестігінің Қызылорда облыстық филиалының төрағасы С. Аңсат сөз сөйлеп, «Мемлекеттік тіл және БАҚ» облыстық байқауының жеңімпаздарын және мемлекеттік тілді дамыту бағытында белсенділік танытып жүрген жәнеоблыс тұрғындарына қазақ тілінде сапалы қызмет көрсетіп отырған тіл үздіктерін «Үздік этномәдени бірлестік», «Тіл жанашыры», «Үздік қазақтілді кәсіпкерлік нысан», «Үздік қазақтілді қаржылық ұйым», «Үздік қазақтілді ас мәзірі», «Үздік қазақтілді кәсіпкер», «Үздік қазақтілді нотариус» номинацияларымен марапаттады.
Фестиваль барысында жиналған қауымға мерекелік шашу ретінде әзірленген концерттік бағдарлама ұсынылып, шара «Жаса, жаса, қазақ тілім!» әнімен аяқталды.