Мемлекет басшысы Қасым-Жомарт Тоқаев еліміздің жоғары білім беру жүйесінің халықаралық деңгейде мойындалып келе жатқанын атап өтті.
Президент «Қазақстан – академиялық білім аймағы» атты стратегиялық серіктестер форумында сөйлеген сөзінде, қазақстандық бес университеттің Times Higher Education беделді басылымының әлемдегі үздік жоғары оқу орындары рейтингіне кіргенін мәлімдеді.
Мемлекет басшысының айтуынша, соңғы жылдары еліміздің университеттері әлемдік рейтингтерде өз позицияларын едәуір нығайтып келеді.
«QS халықаралық рейтинг агенттігінің президенті Нунцио Квакварелли өз баяндамасында бұл бағыттағы оң өзгерістерге кеңінен тоқталды. Ол қазақстандық университеттердің серпінді дамып келе жатқанын ерекше атап өтті. Біз ортақ мақсаттар жолында ынтымақтастықты тереңдетуге және өзара әріптестікті одан әрі арттыруға дайынбыз. Сонымен қатар, еліміздің бес жоғары оқу орны Times Higher Education рейтингінде әлемнің ең үздік университеттерінің қатарына қосылды. Бұл – біздің білім саламыз үшін айтарлықтай жетістік», – деді Қасым-Жомарт Тоқаев.
Президенттің айтуынша, бұл табыстар елдегі жоғары білім сапасының артып, ғылыми-инновациялық әлеуеттің күшеюін көрсетеді. Форум аясында академиялық әріптестік пен халықаралық ынтымақтастықты дамыту бағыттары да талқыланды.