Октябрь полиция бөлімінің учаскелік инспекторлары әкімшілік аумақты аралау кезінде тұрғын үйлердің бірінің есігіне жаңадан жапсырылған QR-коды бар парақшаны анықтаған. Тексеру барысында сілтеменің есірткі саудасына қатысты Telegram-арнасына апаратыны белгілі болды. Жедел әрекет ету нәтижесінде құқық қорғау қызметкерлері 14 және 15 жастағы кәмелетке толмаған екі қызды ұстады.
Ұсталғандардың қолында әлі жапсырылмаған 60-қа жуық парақша тәркіленген. Жасөспірімдердің сөзінше, олар бұл жұмысты хабарландыру арқылы тапқан. Әрбір жапсырылған парақша үшін оларға 70 теңге төленген. Мектепте бұған дейін мұндай іс-әрекеттер үшін қылмыстық жауапкершілік көзделетіні бойынша бірнеше рет ескерту жасалғанына қарамастан, оқушылар бұл жарнаманың зиянсыз екеніне сенгендерін жеткізген. Олар сілтеменің халық тұтынатын тауарлар сататын интернет-дүкенге апаратынын көрсеткен. Қазір қозғалған қылмыстық іс аясында заңсыз материалдарды таратуды ұйымдастырған адамдарды анықтау бойынша тергеу амалдары жүргізіліп жатыр.