Бүгін Абай облысына Шымкент қаласы әкімінің бірінші орынбасары Айдын Кәрімов бастаған делегация келді. Делегация құрамында аймақ ардагерлері, зиялы қауым, «Шымкент-концерт» концерттік ұйымы мен Шымкент қалалық әзіл-сықақ және сатира театрының өнерпаздары, Шымкент-цирк әртістері бар.

Шымкент қаласының мәдениет күндері аясында оңтүстіктен келген меймандар облыс әкімі Берік Уәлимен бірге Абай ауданындағы Абайдың «Жидебай-Бөрілі» мемлекеттік тарихи-мәдени және әдеби-мемориалдық музей-қорығына қарасты Абай музей-үйінде болды. Ғимаратты аралап, ойшылға қатысты құнды жәдігерлермен танысты. Жидебайдағы «Абай-Шәкәрім» кесенесіне барып, ұлылар рухына тәу етті.

Бұдан кейін делегация Абайдың 180 жылдығына орай ұйымдастырылған «Абай салбурыны-2025» республикалық құсбегілер турнирінің жабылу салтанатын тамашалады.

Шымкент қаласының мәдениет күндері аясында бүгін Семей қаласында Мемлекеттік сыйлықтың иегері, белгілі жазушы Құлбек Ергөбек және абайтанушы Ақжол Қалшабек оқырмандармен кездесті. Сондай-ақ Абай атындағы кітапханада Шымкент қалалық әзіл-сықақ және сатира театры «Не істеу керек?» атты сазды-думанды музыкалық комедияны көрерменге ұсынады. Ертең Абай атындағы театрда «Көне қала — Шымкент» тақырыптық көрмесі және  Шымкент қаласы өнерпаздарының

«Шымкент сазы» концерттік бағдарламасы қойылады.

Айта кетейік, осыдан 1 жарым ай бұрын облыс әкімі Берік Уәли бастаған өңір делегациясы Шымкент қаласына арнайы сапармен барған болатын. Сапар барысында Абай атындағы театр ұжымы «Абай айтқан «Еңлік-Кебек» спектаклін көрермендерге ұсынған еді.