Шымкент қаласында орналасқан Қазақстан Республикасы Ұлттық ұланының 6506 әскери бөлімінде Республика күніне орай мерекелік концерт ұйымдастырылды.
Атаулы мерекеге арналған іс-шараның басты мақсаты — әскери қызметшілердің бойында отансүйгіштік сезімді қалыптастыру, ұлттық құндылықтарды дәріптеу және елге деген құрметті арттыру.
Мерекелік концерт барысында 6506 әскери бөлімінің әскери оркестрі мен өнер ұжымдары өз өнерлерін ортаға салып, көрермендерге ерекше көңіл күй сыйлады. Әскери оркестрдің әуезді орындаулары мен патриоттық шығармалары мерекенің салтанатын арттырса, әндер мен билер кештің мазмұнын байыта түсті. Өнерпаздардың әрбір қойылымы көрермендердің ыстық ықыласына бөленіп, зор қошеметке ие болды.
Концерттік бағдарлама аясында «Боз жорға», «Күйім» музыкалық шығармалары және қазақ-түрік попурриі көрермен назарына ұсынылды. Ұлттық әуендер мен түркі халықтарының музыкалық үндестігін танытқан шығармалар кештің мазмұнын толықтырып, көрермендерге ерекше әсер сыйлады.
Әскери оркестрдің орындауындағы музыкалық шығармалар концертке ерекше әсер беріп, әскери қызметшілердің кәсіби шеберлігі мен шығармашылық қабілетін көрсетті. Музыканың құдіреті арқылы Отанға деген сүйіспеншілік, елге адал қызмет ету және ұлттық рухты сақтау идеялары кеңінен насихатталды.
Іс-шара барысында Республика күнінің еліміз үшін тарихи маңызына тоқталып, тәуелсіздікті бағалау, ел бірлігін сақтау және Отан алдындағы жауапкершілікті сезіну әрбір азаматтың парызы екені атап өтілді.
Республика күні — халқымыздың мемлекеттілігін айқындайтын, ұлттық бірегейлігімізді нығайтып, ортақ құндылықтарымызды дәріптейтін маңызды мереке. Бұл күн әрбір қазақстандыққа туған жерге деген сүйіспеншілігін білдіріп, ел болашағына деген сенімін арттыруға мүмкіндік береді.
Қазақстан Республикасы Ұлттық ұланының әскери қызметшілері қоғамдық тәртіп пен азаматтардың қауіпсіздігін қамтамасыз ету жолында абыройлы қызмет атқарып келеді. Ал әскери оркестрдің өнері әскери қызметтің мәдени қырын танытып, жеке құрамның рухын көтеруге үлес қосады.
Осындай мәдени-көпшілік іс-шаралар әскери ұжымдағы бірлікті нығайтып, патриоттық тәрбиені дамытуға және ұлттық мәдениетімізді дәріптеуге ықпал етеді.
Мерекелік концерт көтеріңкі көңіл күй мен ерекше әсерге толы болды. Әскери оркестрдің әуені мен өнерпаздардың өнері жиналған қауымға рухани демалыс сыйлап, Республика күнінің маңызын тағы бір мәрте айшықтады.
Республика күні құтты болсын! Еліміз аман, жұртымыз тыныш, тәуелсіздігіміз тұғырлы болсын! Көк туымыз көкте желбіреп, Қазақстанымыздың мерейі әрдайым үстем болсын!
Автор: Хожалепес Ерсұлтан