Алматының атақты «Қайрат» футбол клубы тағы да ел біріншілігінің биігінен көрінді. Команда биылғы Қазақстан Премьер-лигасының маусымын жеңімпаз ретінде аяқтап, қатарынан екінші рет чемпиондық атаққа қол жеткізді.
Маусымның шешуші ойыны Алматыдағы Орталық стадионда өтті. Бұл турда «Қайрат» пен елордалық «Астана» біріншілік тағдырын айқындады. Алматылықтарға чемпиондық атақты қорғау үшін тең нәтиже де жеткілікті еді. Нәтижесінде тартысты өткен матч 1:1 есебімен аяқталды.
Кездесудің алғашқы бөлігінде басымдығы байқалған «Астана» командасы есепті 15-минутта ашты. Қонақтардың шабуылшысы, хорватиялық ойыншы Марин Томасов командаласы Назми Грипшидің дәл пасын сәтті пайдаланып, қақпа торын тулатты.
Алайда екінші таймда алматылықтар қарқын қосып, ойын өрісін өз пайдасына бұрды. 56-минутта ел құрамасының жас шабуылшысы Дастан Сәтпаев тамаша соққымен таразы басын теңестірді. Бұл гол чемпиондық тағдырын айқындаған сәт болды.
Тең нәтиже «Қайратқа» қажетті ұпайды сыйлады. Команда маусымды 59 ұпаймен аяқтап, ел чемпионы атанды. «Астана» 57 ұпаймен күміс жүлдеге ие болса, Қостанайдың «Тобылы» 54 ұпаймен үздік үштікті қорытындылады.
Биылғы маусым алматылық клуб үшін ерекше маңызға ие болды. Команда ойын сапасы мен тұрақтылығымен көзге түсіп, тағы да өз жанкүйерлеріне қуаныш сыйлады. «Қайраттың» бұл жетістігі – ұжымның қажырлы еңбегі мен жүйелі жұмысының нәтижесі.