Биыл желтоқсанда 411 мыңнан астам адам атаулы әлеуметтік көмек алған. 77,6 мың отбасындағы 411,3 мың адамға атаулы әлеуметтік көмек тағайындалса, биыл осы мақсат үшін бюджеттен 54,7 млрд теңге қарастырылған.
Бұрын хабарланғандай, АӘК-нің негізгі мақсаты – ақшалай төлем түрінде қолдауды жүзеге асыру және отбасының еңбекке қабілетті мүшелерін жұмыспен қамтуға жәрдемдесудің белсенді шараларына тарту арқылы отбасын қиын өмірлік жағдайдан шығаруға бағытталған.
АӘК арқылы табысы өңірлік ең төмен күнкөріс деңгейінің 70% — нан аспайтын азаматтарға тоқсан сайын әлеуметтік көмек тағайындалады. Сондай-ақ табысы аз отбасылардағы 1 жас пен 6 жас аралығындағы әр балаға 1,5 АЕК (5 538 теңге) мөлшерінде ай сайынғы қосымша төлем беру көзделген. Биыл 1 желтоқсанға АӘК алушылар қатарынан мектеп жасына дейінгі 128,8 мың балаға 5 млрд. теңге сомасына қосымша төлем тағайындалып отыр. Ал жұмысқа орналастыру, өз ісін ашуға ниетті отбасыларға гранттар беру, біліктілікті арттыру курстарына жіберу (қажет болған жағдайда) секілді жұмыспен қамтуға жәрдемдесу де қарастырылады.
Еске сала кетейік, қазір қазақстандықтар АӘК тағайындауға өтінішті тұрғылықты жері бойынша мансап орталығында, ауыл округінің әкіміне, сондай-ақ Электрондық үкімет порталы (egov.kz) арқылы бере алады.