Шымкенттік дәрігерлер 10 минут бойы жүрегі соқпаған науқастың өмірін сақтап қалған.
Қырық жастағы науқас №2 қалалық ауруханаға «гиповолемиялық шок» және «бүйрек жетіспеушілігі» диагнозымен аса ауыр жағдайда жеткізілген.
«Науқастың жүрегі 10 минутқа тоқтап қалды, оны дереу реанимация бөліміне жатқызды. Жедел жүргізілген реанимациялық шаралардың арқасында дәрігерлер жүрек ритмін қалпына келтіріп, науқасты жасанды тыныс алу аппаратына қосты», делінген хабарламада.
Ер адам бес күн бойы нефрология бөлімшесінде ем алып, жағдайы жақсарған. Реаниматолог Жасур Мұхитдинұлының айтуынша, дәрігерлер тобының үйлесімді жұмысының арқасында науқастың жағдайын тұрақтандыру мүмкін болған. Қажетті ем-домнан үйіне шығарылған.