Қызылордада кәсіпкерлерді ұлының оқу ақысын төлеуге міндеттеген экс-шенеунік сотталды. Бизнес өкілдерінің жұмыс істеуіне мүмкіндік бермей, лауазымын асыра пайдаланған бұрынғы басқарма басшысы 9 ай бас бостандығынан айырылды.
Сотталушы кәсіпкерлік және өнеркәсіп басқармасын басқарып отырған тұста ұлының бір жарым миллион теңге оқу ақысын кәсіп иелеріне төлеуді тапсырған. Бұдан бөлек, бизнесмендер құны 7 миллион теңгеге жуықтайтын дизель отынымен қамтамасыз етіп отыруға міндеттеліпті. Сондай-ақ, кей кәсіпорындардың сұйытылған газ алуына заңсыз шектеу қойып, жұмыс істеулеріне кедергі келтірген. Экс-шенеуніктің бұл әрекетінен кәсіпкерлерге 27 миллион теңгедей шығын келген.
Басқарманың бұрынғы басшысы жасаған заңсыз әрекеттерінің барлығы сотта дәлелденді. Ендігі жерде экс-шенеунік өмір бойы лауазымды қызмет атқара алмайды.