Қазақстан Парламенті «Жасанды интеллект туралы» заң жобасын және оған байланысты түзетулерді толықтай мақұлдады. Мәжіліс сенат енгізген өзгерістермен келісті, деп хабарлайды KAZ.NUR.KZ Мәжілістің баспасөз қызметіне сілтеме жасап.
Сенат ұсынған түзетулердің барлығы негізінен редакциялық және нақтылау сипатындағы өзгерістер болып табылады.
Мәжілістің жұмыс тобының жетекшісі Екатерина Смышляева атап өткендей, сенат барлығы 16 түзету енгізген, алайда олар заңның мазмұны мен мәніне әсер етпейді.
«Бұл түзетулер тек техникалық сипатта және құқық қолдану тәжірибесіне ықпал етпейді. Сондықтан Мәжіліс сенат енгізген толықтырулармен келісуге шешім қабылдады», — деді депутат.
Еске сала кетейік, биыл 23 қыркүйекте Мәжіліс жалпы отырысында «Жасанды интеллект туралы» заң жобасын қабылдаған болатын.
Мәжіліс төрағасы Ерлан Қошанов сол кезде ұлттық жасанды интеллект платформасы құрылатынын айтып, бұл заң Президенттің цифрландыру мен жасанды интеллектті кеңінен енгізу жөніндегі бастамасын жүзеге асыру жолындағы маңызды қадам екенін атап өткен еді.
Сонымен қатар, ол Қазақстанның мұндай заң қабылдаған әлемдегі алғашқы елдердің бірі екенін атап өтті.
Бұған дейін, сенаторлар заң жобасына бірқатар түзетулер енгізіп, оны Мәжіліске қайта жіберген болатын.
Атап айтқанда, 18 жасқа толмағандарға темекі өнімдерін сатқаны үшін коммерциялық емес ұйымдардың жауапкершілігін қарастыру, сондай-ақ жасанды интеллект жүйесі арқылы жасалған туындыларда адамның шығармашылық үлесі болған жағдайда ғана авторлық құқықпен қорғалуы туралы түзетулер ұсынылды.
Сонымен бірге, сенат депутаттары жасанды интеллектіні пайдалану кезінде туындайтын тәуекелдерге қатысты бірқатар нақтылаулар енгізуді ұсынды.