Астанадағы «Қазақ елі» алаңында Ұлы Жеңістің 80 жылдығына арналған әскери парад өтті. Салтанатты шараға Қазақстан Республикасының Президенті Қасым-Жомарт Тоқаев пен елімізге мемлекеттік сапармен келген Вьетнам Коммунистік партиясы Орталық комитетінің Бас хатшысы То Лам қатысты.
Парадты Қазақстан Қарулы Күштері Құрлық әскерлерінің Бас қолбасшысы, генерал-майор Мереке Көшекбаев басқарды. Мемлекеттік Ту мен Жеңіс Туын Мемлекеттік күзет қызметінің ту ұстаушылары салтанатты түрде алып шықты. Жеңіс Туы – 1945 жылы 30 сәуірде Рақымжан Қошқарбаев пен Григорий Булатов Рейхстагқа тіккен туының дәл көшірмесі.
Салтанатты жиында Мемлекет басшысы сөз сөйлеп, Ұлы Жеңістің тарихи маңызын атап өтті. Президент майданға 1 миллион 200 мыңнан астам қазақстандық аттанғанын, олардың жартысы Отан үшін жанын пида еткенін айтты. Тылдағы еңбеккерлердің жанқиярлық әрекеттері де назардан тыс қалған жоқ. Қазақстаннан майданға мыңдаған вагон азық-түлік пен киім жөнелтіліп, қысқа мерзім ішінде қару-жарақ, оқ-дәрі және әскери киім өндіретін зауыттар іске қосылғаны атап өтілді.
Президент ел бойынша 500-ге жуық көшеге батырлардың есімі берілетінін, сондай-ақ «Батырларға тағзым» атты шеру ұйымдастырылатынын жеткізді. Бұл шеруде майдангерлердің ұрпақтары ардагер аталары мен апаларының суреттерін алып жүрмек.
Әскери парадқа 4,5 мыңнан астам әскери қызметкер қатысты. Олардың қатарында 200-ден астам әскери әйел мен 250 кадет сап түзеді. Механикаландырылған колонна құрамында 300-ден астам әскери техника жүріп өтті. Астана аспанында 66 әуе кемесі қалықтады.
Бұл парад – еліміздің батыр бабалар рухына бас июі мен қазіргі Қарулы Күштерінің айбынды келбетін танытқан тарихи сәтке айналды.
Нұрай Даулетжанқызы Т. Жүргенов атындағы Қазақ Ұлттық өнер академиясы Компьютерлік технологиялар кафедрасы Медиажурналистика мамандығының 1-курс студенті