Македонияның астанасы Үскүп екіге бөлінеді: қаланың ескі бөлігінде мұсылман албандар тұрса, жаңадан салынған бөлігінде македониялықтар тіршілік етеді. Өкінішке қарай, 1963 жылғы жер сілкінісінен кейін Үскүптің тарихи бөлігінің 70 пайызы зардап шегеді. Ескі қаланың XI ғасырдағы тас қамалға жақын маңдағы орталық алаңы, түрікше «чаршы» аталатын базары, 1466 жылдары Дауд паша салдырған түрік моншалары, Мұстафа паша мешіті, XV ғасырда түріктер салған тас көпір, Македонияның ұлттық театры, 1550 жылдары салынған Күршүмлі ханның керуен сарайы т.б. санаулы ғана ескерткіш аман сақталған. Керуен сарай кейін он тоғызыншы ғасырда түрменің міндетін атқарыпты.
1912 жылдың 25 қазанында Үскүпке 520 жыл бойы үстемдік еткенін тойлаған Осман империясы билікті келесі жылы сербтердің әскеріне береді. Ал сербтер алдымен қаланың атын «Скопле» де өзгертеді.
Базарда сауда жасағанда македониялық денармен бірге еуро жұмсадық. Тауарлар құны әлбетте, біздің таразылауымыз бойынша аса төмен емес. Бірақ күнкөріс деңгейі жоғары еуропалықтар базардағы бағаға дән риза.
