Қазақстанда азаматтардың мүгедектігін белгілеу үшін тәуелсіз сарапшылар тартыла бастады.
«Елімізде медициналық-әлеуметтік сараптамаға жіберілетін азаматтарды сырттай проактивті форматта куәландыруға тәуелсіз сарапшыларды тарту бойынша пилоттық жоба басталды. Қазақстанның Әлеуметтік кодексінде 2025 жылғы 1 қаңтардан бастап тәуелсіз сарапшылар институтын толық көлемде енгізу көзделген», деп мәлімдеді Еңбек және әлеуметтік қорғау министрлігі.
Тәуелсіз сарапшыларға бірнеше талап қойылады: жоғары медициналық білім; денсаулық сақтау саласындағы маман сертификаты; медициналық-әлеуметтік сараптама жүргізу мәселелері бойынша соңғы 5 жылда оқудан өткенін растайтын құжат.
Тәуелсіз сарапшыларды іріктеу біліктілік деңгейі мен жұмыс өтілі ескеріле отырып, конкурстық негізде жүргізіледі. Пилоттық жоба аясында конкурсқа 50-ге жуық адам қатысқан. Іріктеудің барлық кезеңінен 18 сарапшы дәрігер сәтті өтіп, жұмысқа кірісті. Министрлік түсіндіргендей, тәуелсіз сарапшыларға мүгедектігі бар пациенттің медициналық құжаттары мемлекеттік органдар мен Денсаулық сақтау министрлігінің ақпараттық жүйелерінен алынған деректер негізінде автоматты түрде электронды түрде түседі. Бұл ретте тәуелсіз сарапшы мүгедектігін белгілейтін пациенттің аты-жөні кім екенін білмейді.
Медициналық құжаттар эксаумақтық тәртіппен бөлінеді. Алматыда тұратын сарапшыға басқа өңірлерден құжаттар келеді. Еңбек министрлігі тәуелсіз сарапшылар институтын енгізу арқылы қазақстандықтардың сарапшылармен байланысын болдырмай, сыбайлас жемқорлықтың алдын алуды көздеп отыр.
Медициналық-әлеуметтік сараптама жасалып, мүгедектік тобы анықталғаннан кейін тиісті әлеуметтік төлемдер мен арнаулы әлеуметтік қызметтер проактивті түрде, яғни ешқандай өтінішсіз тағайындалады.