Ішкі істер министрлігінің мәліметінше, соңғы 6 жылда қабылданған ұйымдастыру әрі құқықтық іс-шаралардың нәтижесінде әйелдердің құқықтарына қол сұғатын қылмыстар саны екі есеге (47%-ға, 2019 жылы 96 337-ден 2024 жылы 51 057-ге дейін) азайған. Бұл туралы ведомство Қазақпарат агенттігіне берген жауабында келтірген.
Соның ішінде әйелдерге қатысты жасалған зорлық-зомбылық қылмыстары 48%-ға (2019 жылы 2 947-ден 2024 жылы 1 511-ге дейін), ал оның ішінде кісі өлтіру 27%-ға денсаулыққа ауыр зиян келтіру 25%-ға, әйелдерге қатысты орташа ауырлықтағы дене жарақаттарын салу 22%-ға кеміген. Ұрып-соғу және денсаулыққа қасақана зиян келтіру қылмыстарының криминализациясынан соң 2024 жылғы 12 айдың қорытындысында (2023 жылдың осы кезеңімен салыстырғанда) елдің барлық өңірінде тұрмыстағы қылмыстар саны 3,7 есе артқан (923-тен 3 371-ге дейін), оның ішінде теріс қылықтар саны 138 есе (18-ден 2 486-ға дейін) өскен.
«Құқық бұзудың осы түрінің өсуінің негізгі себептеріне тоқталсақ, бұл — 2024 жылдың 16 маусымынан бастап енгізілген заңдағы жаңашылдықтың нәтижесі. Бұл ретте, ұрып-соғу мен денсаулыққа жеңіл зиян келтіруді криминализациялау арқылы мүмкін болды. Ұрып-соғу және денсаулыққа жеңіл зиян келтіру қылмыстық теріс қылық болып санала бастады. Осылайша, барлық тіркелген (3 371) деректің 2 486-сы теріс қылықтар (74%), яғни қылмыстық құқық бұзу ретінде саналды. Сонымен қатар, криминализация енгізілгеннен кейін, тұрмыстағы зорлық-зомбылық саласындағы қылмыстық құқық бұзу деректері 2,2%-ға (905-тен 885-ке дейін), оның ішінде ауыр қылмыстарды, кісі өлтіру 6,4%-ға (125-тен 117-ге дейін), денсаулыққа ауыр зиян келтіру 25,5%-ға (337-ден 251-ге дейін), денсаулыққа орташа ауырлықтағы зиян келтіруді 12%-ға (336-дан 296-ға дейін) төмендетуге мүмкіндік туды», деп аталып өткен ведомство ақпаратында. Есепті кезеңде 108 мың жанжалқой әкімшілік жауапкершілікке тартылды, оның ішінде 30 мыңы (30 185) қамауға алынған.
Министрліктің дерегінше, тұрмыстағы зорлық-зомбылық құрбандарын қорғау мақсатында учаскелік полиция инспекторлары 85 мың қорғау нұсқамасын шығарған. Полицияның өтініші бойынша соттар құқық бұзатын адамдардың мінез-құлқына 18 мың ерекше талап орнатты. Барлығында бақылау істері жүргізіліп, полицияның күшейтілген бақылауы белгіленген.