Ұлттық статистика бюросы еліміздің былтырғы демографиялық ахуалы туралы нақтыланған мәліметтерді ұсынды.
2025 жылғы 1 қаңтардағы жағдайға сүйенсек, елдегі халық саны 20 286 084 адам болды. Соның ішінде қала тұрғындары — 12 774 743, ауыл тұрғындары — 7 511 341 адам. Халықтың саны бір жылда 252 242 адамға өсті, оның ішінде табиғи өсім есебінен 235 078 адамға, көші-қон есебінен — 17 164 адамға артқан.
12 ай ішінде 368 670 сәби дүниеге келген, оның ішінде ұлдар — 190 213, қыздар — 178 457. Туудың ең жоғары деңгейі: Түркістан облысы (1000 тұрғынға 25,05 адам), Маңғыстау облысы (24,47), Шымкентте (23,68) байқалды. Осы уақыт ішінде 133 592 адам қайтыс болған. Өлім-жітімнің ең жоғары деңгейі Солтүстік Қазақстан (1000 тұрғынға шаққанда 11,57), Шығыс Қазақстан (11,29) және Қостанай (10,18) облыстарында байқалды, бұл осы аймақтардағы халықтың жас құрылымына байланысты. Сондай-ақ, былтыр 123 651 неке және 40 647 ажырасу тіркелген.