Қазақстанда коронавирус жұқтырғандар саны күрт артқан. Үкімет елге шекара сыртынан келетін шет ел азаматтарымен бірге Қазақстан азаматтарына да арнайы тест тапсыруды міндеттеді. 8 қазанда ауру жұқтырған 33 адамды ұшақтан түсірген. Ал қолдарында анықтамасы жоқ 5 мыңнан астам адамды тексеруден өткізіп, ауырмайтындарын ғана үйлеріне жіберген.
Алматының Бас санитары Жандарбек Бекшин отандастарды шет елдерге шығудан уақытша бас тартуды өтінді: «Әлемде жағдайдың ушығып кеткенін көріп отырсыздар. Біздің елде де демалуға лайықты керемет жерлер бар». Оның айтуынша, Қазақстан азаматтары Шарм-әл-Шейх (Египет), Түркия мен Біріккен Араб Әмірліктерінен көп жұқтырып келіп жатыр. Сол себепті Бас санитар аталған үш аймаққа бармау керектігін ескертті.