BAQ.KZ тілшісі желтоқсан айында елде енгізілетін жаңалықтар мен басты өзгерістер тізімін ұсынады.
Тәуелсіздік күні
16 желтоқсан – қазақ халқы үшін аса маңызды тарихи дата, Тәуелсіздік алған күн.
Қазіргі таңда бұл күн ұлттық мереке мәртебесіне ие емес. Мұндай мәртебе 25 қазан – Республика күніне берілген. Соған қарамастан, 16 желтоқсанның ел үшін мән-маңызы өзгеріссіз қалуда.
Желтоқсан айындағы демалыс күндері
5 күндік жұмыс аптасында істейтін азаматтар 8 күн, ал 6 күндік жұмыс кестесіндегі адамдар 4 күн демалады.
Желтоқсандағы басты мереке – 16 желтоқсан, сейсенбіге түсіп тұр. Осы күні қазақстандықтар бір күн демалысқа шығады.
Айта кетейік, 31 желтоқсан – жұмыс күні.
Желтоқсан айының ауа райы
Қазгидрометтің болжауынша, айдың басында жылы ауа массалары оңтүстіктен жиі келіп тұрады. Алайда ара-тұра арктикалық суық та жетіп, тәуліктің ішінде температура 10–20 градусқа ауытқуы мүмкін. Суық толқындар кей кездері оңтүстік өңірлерге дейін әсер етеді.
Жалпы болжам бойынша, желтоқсан айы қалыпты жылы болып, жауын-шашын мөлшері норма айналасында болады.
Желтоқсанда атап өтілетін кәсіби мерекелер
-
5 желтоқсан – Адвокатура күні
-
6 желтоқсан – Прокуратура қызметкерлерінің күні
-
13 желтоқсан – ҚАЖ қызметкерлерінің күні
-
20 желтоқсан – Мемлекеттік фельдъегерлік қызметі күні
-
22 желтоқсан – Мұрағатшылар күні
Оқушылардың демалысы
Оқу жылының кестесіне сәйкес, екінші тоқсанда 8 оқу аптасы бар.
Қысқы каникул 2025 жылғы 29 желтоқсанда басталып, 2026 жылдың 7 қаңтарына дейін жалғасады. Демалыс ұзақтығы – 10 күн.
Автолизинг жеке тұлғаларға қолжетімді болады
1 желтоқсаннан бастап азаматтар автолизинг рәсімдей алады. Бұрын мұндай мүмкіндік тек заңды тұлғаларға берілетін. Енді жеке адамдар да көлікті лизингке алып, кейін толық сатып алуына немесе кері қайтаруына болады.
Жаңа авиабағыттар іске қосылады
Қазақстан мен Өзбекстан бірлесіп жаңа туристік бағыттар ашуда.
1 желтоқсаннан SCAT әуе компаниясы Түркістаннан Бұхараға, Үргенішке (Хиуа) және Самарқандқа тұрақты түрде рейстер орындайды. Әр бағытқа аптасына үш рет ұшақ қатынайды.
Шымбұлақ маусымын ашады
7 желтоқсанда Шымбұлақ тау-шаңғы кешені қысқы маусымды ресми түрде бастайды. Биыл негізгі жалға беру пункттері мен маусымдық локерлер Медеу станциясына көшірілген. Ал Шымбұлақта келушілер үшін күнделікті қолдануға арналған сақтау жәшіктері жұмыс істейді.
Тұрғын үй көмегі жаңа тәртіппен есептеледі
2 желтоқсаннан бастап тұрғын үй көмегін тағайындаудың жаңартылған ережелері күшіне енеді.
Өзгерістер коммуналдық қызметтерді тұтынудың нормаларын қайта қарауды қамтиды. Осы нормалар негізінде отбасының әлеуметтік көмекке құқығы есептеледі.
«Наурыз» бағдарламасына өтініш қабылдау аяқталады
«Наурыз» тұрғын үй бағдарламасына өтінім қабылдау 3 қарашада басталған болатын. Құжаттарды тапсыру 1 желтоқсанға дейін жалғасады.
Бағдарлама арқылы азаматтар алғашқы пәтерін 10% бастапқы жарнамен және 7%-дан басталатын жылдық мөлшерлемемен ала алады.
Қысқы шиналарды дер кезінде ауыстыру қажет
«Дөңгелекті көлік құралдарының қауіпсіздігі туралы» техникалық регламентке сәйкес, көліктер қыс мезгілінде міндетті түрде қысқы шиналармен жүруі тиіс.
Астанада суық ерте түсетінін ескерсек, шиналарды алдын ала ауыстырып қойған жөн.
ҚР ӘҚБтК 590-бабының 5-бөлігіне сай, 1 желтоқсаннан 1 наурызға дейін қысқы шиналарсыз жүру – 5 АЕК көлемінде айыппұл (2025 жылы 19 660 теңге). Бір жыл ішінде қайталанса, айыппұл мөлшері 20 АЕК – 78 640 теңге болады.