Қарағанды облысына қарасты Шет ауданындағы Мойынты теміржол станциясында орналасқан дәмханалардың бірінде газ баллонының жарылысы тіркеліп, артынан өрт тұтанған. Оқиға орнына жедел жеткен Төтенше жағдайлар министрлігінің бөлімшелері тілсіз жауды бақылауға алды.
Қатты әрі ашық жалынның салдарынан өртті ауыздықтау оңайға соқпаған. Шамамен 200 шаршы метр аумақта ғимараттың төбесі опырылып түсіп, құтқарушылар үйінділерді тазалау жұмыстарын жүргізуге мәжбүр болды. Өрт шыққан сәттің бейнежазбалары әлеуметтік желілерде кеңінен тарады.
Тілсіз жау жалпы көлемі 300 шаршы метр аумақта толық сөндірілді. Алдын ала болжам бойынша, жарылыс газбен жабдықтау жүйесін, соның ішінде тұрмыстық газ баллондарын пайдалану кезіндегі қауіпсіздік талаптарының сақталмауынан орын алған.
Ресми деректерге сәйкес, қайғылы жағдай салдарынан екі адам көз жұмып, тағы он бір тұрғын аудандық ауруханаға жеткізіліп, медициналық көмек көрсетілді. Қазіргі уақытта құтқару қызметі зақым келген нысандарды тексеріп, қайта өрт шығу қаупінің алдын алу шараларын қолға алып жатыр.
Фото: Кадрдан instagram.com/newskor.krg