Абай облысының жастар саясаты мәселелері басқармасының мемлекеттік әлеуметтік тапсырысы аясында «Заң және Тәртіп» идеологиялық нарративі бойынша «Жастармен жұмыс істеудегі сын қатерлер өзекті мәселелер және тәуелділіктің алдын алу жолдары» атты облыстық оқыту семинары ұйымдастырылды. Жиын профильдік мемлекеттік мекемелердің мамандарына арналды.
Шараға білім беру, денсаулық сақтау салаларының өкілдері және Полиция департаментінің қызметкерлері қатысты. Семинарды Астана қаласының психиатр-нарколог дәрігері, Астана медициналық университетінің оқытушысы Тоқтар Қойшыбеков жүргізді.
Спикер жастар арасындағы зиянды әдеттерге тәуелділіктің өсуі алаңдатарлық деңгейге жеткенін айтты.
— Бүгінгі оқыту семинары жаман әдеттерге тәуелділіктің, оның ішінде есірткі, алкоголь, шылымқорлық және ойынқұмарлықтың алдын алу мәселелеріне арналды. Соңғы уақытта психикалық денсаулыққа қатысты дерттердің «жасарып» келе жатқаны байқалады. Өкінішке қарай, жастардың өздері біздің пациенттерімізге айналып бара жатыр. Қазіргі таңда стационарда 20–25 жас аралығындағы жастар ем қабылдауда. Бұл аурулардың ұрпаққа берілуі немесе әлеуметтік-психологиялық әсері олардың балаларын да қиындыққа душар етеді. Тәуелділіктің жасарып келе жатуы – қоғам үшін өте қауіпті құбылыс. Дәл осындай оқыту семинарлары мен тәрбиелік жұмыстарды күшейту қажет. Жастар зиянды әдеттерге емес, өнерге, спортқа, білімге және пайдалы дағдыларға «тәуелді» болуы тиіс, – деді Тоқтар Қойшыбеков.
Семинар барысында қатысушыларға тәуекел топтарын ерте анықтау тәсілдері, психологиялық қолдау көрсету әдістері және профилактикалық жұмыстың тиімді тәжірибелері ұсынылды.
Көлік колледжінің тәрбие ісі жөніндегі орынбасары Асия Аубакирова жастар тәрбиесінде отбасылық құндылықтар мен жүйелі алдын алу шараларының рөліне тоқталды.
— Бүгін ұйымдастырылып отырған семинардың маңызы өте жоғары, өйткені ол қоғамдағы өзекті мәселелердің біріне арналған. Жастарды түрлі зиянды әдеттерден қорғау, олардың алдын алу ең алдымен отбасындағы тәрбиеден басталады. Біздің оқу орнымыз – Көлік колледжінде тәуелділіктің алдын алу бағытында арнайы тәрбие жоспары бекітілген. Сол жоспар аясында студенттердің құқықтық сауаттылығын арттыру, көзқарастарын қалыптастыру бойынша түрлі кездесулер мен шаралар ұйымдастырамыз. Арнайы мамандар шақырылып, тәуекел тобына жататын студенттер анықталады және олармен жыл бойы жүйелі жұмыс жасалады, – деді ол.
Семинар соңында барлық қатысушыларға арнайы сертификаттар табысталды.