Түркиядағы парламенттік сайлауда Түркия президенті Реджеп Тайип Ердоғанның Әділет және даму (АКР) партиясы алдын ала шығарылған нәтиже бойынша басымдыққа ие болды. Түбі бір түркі елдері үшін аса маңызды саналатын саяси науқанға «Түркітілдес журналистер қоры» ҚҚ мен Қазақстандағы Әйел журналистер клубының мүшелері де халықаралық бақылаушы ретінде қатысып жатыр.
Сонымен, түріктер еліндегі парламенттік сайлау аяқталды. 26-шақырылым депуттаттарын сайлауға 54 миллион 49 мың 940 сайлаушы қатысып, дауыстарды санауға 175 мың 6 сандық қолданылды.
Ұлттық Мәжіліске өтуге 16 партия мен 21 тәуелсіз үміткер бақ сынаған. Бүгін, яғни, 2015 жылдың 1 қарашасында өткізілген дауыс беру процесі түріктер елінің 32 аймағында сағат 16.00-де, ал басқаларында 17.00-де аяқталды.Сайлау қағаздарын санауға кіріскен Түркияның Орталық сайлау комиссиясы сандықтардың 72 пайызын ашты. Нәтижесінде, Реджеп Тайип Ердоғанның Әділет және даму партиясы (АКР) басым дауыспен алға шықты – 51,3%.
