2026 жылғы 29 қазанда Түркияның әлемге әйгілі туристік аймағы Каппадокияда қайғылы оқиға болды. Гөреме ашық аспан астындағы музейінің кіреберісінде алып жартастың бір бөлігі опырылып құлап, салдарынан үш адам қаза тауып, бес адам жарақат алды.
Оқиға жергілікті уақыт бойынша сағат 15:15 шамасында болған. Алдын ала мәліметтерге сәйкес, толассыз жауған жаңбыр салдарынан жанартаулық тау жыныстары босап, «пері мұржалары» деп аталатын табиғи жартастардың бір бөлігі құлаған.
Қаза тапқандардың арасында 31 жастағы түркиялық журналист Фатих Эрай Туна, оның жұбайы Бегюм Четинкая Туна және 37 жастағы Франция азаматшасы бар. Жас журналист пен жұбайы биыл шілде айында ғана шаңырақ көтерген.
Невшехир провинциясының губернаторы Хүсейін Көк оқиға орнында құтқару жұмыстары жүргізілгенін мәлімдеді. Жарақат алған бес адамның төртеуі ауруханадан шығарылып, біреуі ем қабылдауды жалғастырған.
Түркияның Әділет министрлігі қайғылы оқиғаға байланысты тергеу бастады.
ЮНЕСКО-ның дүниежүзілік мұралар тізіміне енген Каппадокия жыл сайын әлемнің түкпір-түкпірінен миллиондаған туристі қабылдайды. Бұл қайғылы жағдай табиғи ескерткіштер орналасқан туристік аймақтардағы қауіпсіздік шараларының маңыздылығын тағы бір мәрте көрсетті.