Алматыда Құрылтай депутаттарының сайлауында дауыс беру белсенді жалғасып жатыр. Таңертеңнен бері қаладағы сайлау учаскелерінде халық көп. Әртүрлі жастағы алматылықтар дауыс беру құқығын пайдаланып, азаматтық борышын орындау үшін сайлау учаскелеріне келуде.
Учаскелерден жастарды да, аға буын өкілдерін де, бала-шағасымен келген отбасыларды да кездестіруге болады. Көптеген қала тұрғыны үшін сайлауға қатысу бүгінгі күннің маңызды бөлігіне айналды. Олар азаматтық ұстанымын білдіріп, ел болашағын айқындауға атсалысу мүмкіндігін назардан тыс қалдырмау керек екенін айтады.
Алматыдағы сайлау азаматтық жауапкершілікпен қатар, мерекелік көңіл күймен өтіп жатыр. Сайлау учаскелеріне келген тұрғындарды музыка, ән мен би қарсы алады. Мұнда көтеріңкі әрі жайдары ахуал қалыптасқан. Көпшілік үшін дауыс беру отбасымен бірге уақыт өткізуге де жақсы мүмкіндік болып отыр.
Сайлау нышандары мен арнайы кейіпкерлер бейнеленген фотоаймақ келушілердің ерекше қызығушылығын тудырды. Алматылықтар жақындары және достарымен естелік суретке түсіп жатыр. Мұндай алаң ересектердің де, кішкентай келушілердің де назарын аударып, сайлау күніне мерекелік реңк беруде.
Кейбір сайлау учаскелерінің жанында жәрмеңке жұмыс істеп тұр. Мұнда азық-түлік, мектепке қажетті керек-жарақтар және күнделікті тұрмысқа қажет өзге де тауарлар ұсынылған. Соның арқасында көптеген қала тұрғыны сайлауға қатысуды демалыс күніндегі өзге де шаруаларымен ұштастырып отыр.
- In
Тұрғындардың белсенділігі күні бойы байқалуда. Сайлау учаскелерінде әртүрлі жастағы азаматтар кезекке тұрып, дауыс беру сәтін сабырмен күтеді. Олар бір-бірімен әңгімелесіп, мерекелік бағдарламаны тамашалайды, ал дауыс бергеннен кейін арнайы безендірілген аймақтарда естелік суретке түседі.
Алматылықтардың сайлауға деген көзқарасы да ерекше мәнге ие. Көпшілік үшін сайлауға қатысу – бюллетеньге белгі қою ғана емес, ел өміріне өзінің қатысы барын сезінудің мүмкіндігі. Қоғамның ортақ таңдауы әр азаматтың осындай жеке шешімінен құралады.
Бүгін Алматы сайлаудың азаматтық жауапкершілік пен мерекелік көңіл күй тоғысқан маңызды оқиға бола алатынын көрсетіп отыр. Тұрғындар сайлау учаскелеріне отбасымен келіп, дауыс беріп, естелік суретке түсіп, түрлі іс-шараларға қатысып, уақытын бірге өткізуде. Ең бастысы әр азамат таңдау жасап, Қазақстанның болашағына үлес қосуға мүмкіндік алып отыр.