Атырау облысында қайтарымсыз грант қаржысын мақсатсыз жұмсаған 21 кәсіпкер грант қаржысын бюджетке қайтарады.
Атырау облыстық кәсіпкерлік және өнеркәсіп басқармасының бөлім басшысы Сәттіғұл Сабыровтың мәліметінше, мемлекет тарапынан берілетін қайтарымсыз грант түрі көп. Кәсіп бастау үшін бизнес жоба ұсынғандарға мемлекеттен қайтарымсыз грант қаржысы «Даму» қоры арқылы беріліп келеді. Мұндай қаржы ұсынылған жобаларды іске асыруға жұмсалуға тиіс. Алайда мониторинг қорытындысымен ұсынылған бизнес жобалар іске асырылмаған, грант қаржысын қолма-қол жұмсау дерегі анықталып отыр.
«Қайтарымсыз грант қаржыны көзделген мақсатқа пайдалану талабы орындалмай отыр. Сол себептен 21 кәсіпкерлік субьектісінен грант қаржысын бюджетке қайтару үшін сотқа талап қою арызы жолданған еді. Осы кезге дейін 13 кәсіпкерге қатысты сот шешімі шықты. Сот шешіміне сәйкес 13 кәсіпкер 20 млн теңгеге жуық қаржыны бюджетке қайтаруы қажет», дейді С. Сабыров.