Astana International University базасында студенттерге онлайн-қауіпсіздік жөнінде оқыту сабақтары ұйымдастырылды. Іс-шара «Заң және тәртіп» бастамасы аясында өтті, деп хабарлайды қалалық әкімдіктің ресми сайты.
Сабақтарды Астана қаласы бойынша Экономикалық тергеулер департаментінің қызметкерлері жүргізді.
Жобаның негізгі мақсаты – жастарға жеке деректерді дұрыс қолдану мәдениетін қалыптастыру және интернеттегі жалған ақпаратты ажырату қабілетін дамыту.
Департамент маманы студенттерге түсінікті тілмен цифрлық гигиена ұғымын түсіндіріп, оның интернетте қауіпсіз әрекет етуге және жеке мәліметтерді қорғауға көмектесетін ережелер жиынтығы екенін атап өтті. Бұл дағдылар әсіресе жастар үшін өзекті, себебі олар желідегі ықтимал қауіптердің барлығын бірден аңғара бермейді. Цифрлық сауаттылықты меңгеру — шынайы өмірдегі қаржылық қауіпсіздік негіздерін үйренумен бірдей маңызды.
Сабақ барысында студенттер дипфейктердің қалай жасалатынын, олардың бопсалау, қаржылық алаяқтық және жалған ақпарат тарату сынды схемаларда қалай қолданылатынын білді. Сонымен қатар интернеттегі қауіпсіздік қағидалары, жеке деректерді қорғау тәсілдері және фишинг, желідегі алаяқтық, ақпараттың таралып кетуі сияқты заманауи қатерлер туралы ақпарат алды.
Кездесу интерактивті форматта өтті: студенттер сұрақ қойып, мамандардан нақты практикалық кеңестер алды.
Осындай іс-шаралар жастардың түрлі алаяқтық түрлеріне қарсы иммунитетін нығайтып, олардың цифрлық әрі қаржылық қауіпсіздігін арттыруға ықпал етеді.