Алматыда өткен «Қазақстан – академиялық білімнің орталығы» атты форум барысында әл-Фараби атындағы Қазақ ұлттық университетінде білім алып жүрген Франция азаматы Адриан Давус Мемлекет басшысы Қасым-Жомарт Тоқаевпен қазақ тілінде сөйлесті.
Шетелдік студенттің мемлекеттік тілде еркін сөйлегеніне ризашылығын білдірген Президент оның тіл үйренуге деген талпынысын жоғары бағалады.
– Мен қазақ тілін үйреніп жүрмін. Әрине, шетелдік студент болу оңай емес. Дегенмен, Қазақстанда білім алып жүргеніме қуаныштымын, – деді Адриан Давус.
Мемлекет басшысы өз кезегінде оның жақсы тілдік деңгейін атап өтіп, қазақ тіліне деген қызығушылығы үшін алғысын айтты.
Халықаралық білім орталығына айналған Қазақстан
Форум барысында Қасым-Жомарт Тоқаев Қазақстанның халықаралық білім кеңістігіндегі рөлін арттыруға бағытталған жаңа қадамдар жайында айтты. Президенттің айтуынша, еліміз шетелдік студенттерге барынша жайлы жағдай жасауға мүдделі.
Мемлекет визалық рәсімдерді жеңілдетіп, шетел азаматтарының елде жұмыс істеу және тәжірибе жинақтау мүмкіндіктерін кеңейтуді көздеп отыр.
Қазіргі таңда қазақстандық жоғары оқу орындарында 31 мыңнан астам шетелдік студент білім алуда. Үкіметтің стратегиялық жоспарына сәйкес, 2029 жылға дейін олардың санын 100 мыңға жеткізу межеленген.
Қазақ тілін үйренуге деген қызығушылық артуда
Сарапшылардың пікірінше, шетелдік жастардың қазақ тіліне қызығушылығы артып келеді. Бұл үрдіс Қазақстанның мәдени тартымдылығын және білім беру саласындағы беделінің өсіп келе жатқанын көрсетеді.
Франциялық студент Адриан Давустың бастамасы – соның жарқын дәлелі. Оның қазақ тілінде еркін сөйлеп, мәдениетке құрметпен қарауы халықаралық достық пен өзара түсіністіктің нақты көрінісі болды.
Фото: кадр видеодан