АНКАРА
Анкара — Түркияның астанасы. Ресми деректерге сүйенсек, халқының саны 4,9 мллионға тең. Ал бейресми деректер бұдан едеәуір көп. Тарихта талай соғысты басынан кешірген Анкарада 1919 жылы Мұстафа Кемал Ататүрік ұлт-азаттық көтерілісіне дайындығын бастайды. 1920жылдың сәуірінде Түркияның Ұлы ұлттық жиналысы Анкарада өткізіліп, Ұлттық үкімет құрылады. 1923 жылы Анкара Түркияның астанасы деп жарияланады.
Халқының саны жағынан түріктер елінде бірінші саналатын Стамбұлдан кейін Анкара тұр. Анкара мен Чубук өзендерінің тоғысқан тұсында, теңіз деңгейінен 938 метр биіктікте орналасқан.
Анкара Кіші Азияның ең ежелгі қалаларынан. Біздің дәуірімізге дейінгі VII ғасырында-ақ Ангира немесе Анкира деген атпен белгілі болған ол Еуропа мен Азияны жалғастырған сауда жолының бойында тұр.
Анкара Стамбұлдан кейін экономикалық маңызы бар екінші қала саналады. 1990 жылы Анкара өндірісінің 80 пайызы шоғырланған алғашқы өнеркәсіптік аймақ құрылды. Бұл қалада шағын кәсіпорындар көп. Өйткені шенеуніктер мен оқу орындарының көптігі сауда-саттыққа тиімді.
Анкараның Кәсіпкерлер палатасында қазір 3 мыңғажуық кәсіпорын тіркеліпті. Ал жұмыс істеп тұрған өнеркәсіп нысандары 53 мыңнан астам. Осылардың арқасында 380 мың адам жұмыспен қамтылып отыр.
Анкара қаласына сапарымыздың басты себебі, Түркі елдері Іскер әйелдерінің форумы болатын. Шара шеңберінде әр бұрышы тарихи дерекке толы ескі қаланы аралап, танысудың мүмкіндігі туды. Әсіресе, Анкара қамалы маңындағы серуен қатты ұнады.
Соңғы жылдары Анкара қаласының төңірегінен бой көтере бастаған тұрғынүй кешендеріне сұраныс жоғары.
Нәзия Жоямергенқызы, «Түркітілдес журналистер қоры» ҚҚ
Алматы — Стамбұл — Анкара — Стамбұл — Анкара