Air Astana әуе компаниясы бағдарламалық қамтылымды жаңарту жүргізілуіне байланысты Airbus ұшақтарының бірқатар рейстері уақытша шегерілетінін хабарлады.
Компания ақпаратына сәйкес, Airbus ұшуға жарамдылық туралы директива шығарып, барлық әуе тасымалдаушыларына Airbus ұшақтарындағы биіктікті реттейтін компьютерлер мен операциялық бағдарламаны жедел жаңартуды міндеттеген. Құжатта әр әуе кемесі ұшар алдында аталған жұмысты орындау қажеттігі көрсетілген.
Осыған байланысты Air Astana тобы пайдаланатын Airbus лайнерлерінің қауіпсіз ұшуын қамтамасыз ету үшін міндетті жаңарту жүргізілгенше олардың базадан ұшуы уақытша тоқтатылмақ.
«Air Astana кестеге ықпалды барынша төмендетуге тырысады, бірақ кейбір рейстердің уақыт өзгеруі немесе кешігуі мүмкін. Жолаушыларға ұшу алдында компания сайттарынан рейс мәртебесін тексеріп отыру ұсынылады», – деп мәлімдеді компания.
Сонымен қатар Азаматтық авиация комитеті Air Astana және FlyArystan әуе кемелерінде бағдарламалық қамтамасыз етуді жаңарту қарқынды жүргізіліп жатқанын хабарлады.
Комитет дерегінше, әзірге Air Astana мен FlyArystan инженерлік топтары KC 931 және FS 7063 бағыттарында пайдаланылған екі ұшақта бағдарламалық жүйені жаңартуды аяқтаған.
Қалған әуе кемелерінде жаңарту кезең-кезеңімен жүзеге асуда және жақын күндері толық аяқталады.
«Барлық жұмыстар Airbus-тың ұшу жарамдылығы жөніндегі директивасына толық сәйкес, авиакомпания мамандарының, Азаматтық авиация комитетінің және Қазақстан авиациялық әкімшілігінің тікелей бақылауымен орындалып жатыр. Қызметкерлер тәулік бойы жұмыс істеп, жаңарту процесін барынша жедел аяқтауға және авиациялық қауіпсіздікті толық қамтамасыз етуге күш салуда.
Авиакомпаниялар ұшу кестесінің өзгерісін мейлінше азайту шараларын қабылдап жатыр. Жолаушыларға өз рейстерінің соңғы жағдайын ресми сайттардан алдын ала бақылап отыру ұсынылады. Ұшу қауіпсіздігі – негізгі басымдық. Жүргізіліп жатқан шаралар әуе кемелерінің қауіпсіздігін нығайтуға бағытталған», – делінген комитет хабарламасында.