Қазақстан, Оңтүстік Корея, Германия және АҚШ ғалымдарынан құралған халықаралық зерттеу тобы Шығыс Қазақстандағы Көкен қонысынан табылған ежелгі адам сүйектерін зерттеп, 7 мың жыл бұрынғы ата-бабаларымыздың генетикалық ізін анықтады.
Зерттеу нәтижесі беделді Science Advances ғылыми журналында жарияланды. Ғалымдар 21 көне адамның ДНҚ-сын талдап, олардың бірі б.з.д. 5500 жылдардағы ерте неолит дәуіріне тиесілі екенін дәлелдеген. Бұл қазіргі қазақ жерінде әртүрлі этникалық және мәдени қауымдардың өзара араласқанын айғақтайды.
Зерттеу қорытындысы қазақ халқының генетикалық сабақтастығы кемінде 7 мың жылға созылатынын көрсетіп отыр. Аталған тұжырым қазақ ғылымының атасы, антрополог Оразақ Исмагұловтың еңбектерімен үндес.
🔹 Мақсат Жабағин, Ұлттық биотехнология орталығының Адам генетикасы зертханасының басшысы:
«Біздің нәтижелер қазақ халқының генетикалық тарихы кемінде жеті мың жылға созылатынын айғақтайды. Ертіс өңірі ежелден Еуразия кеңістігіндегі генетикалық және мәдени ықпалдастықтың маңызды торабы болған».
Жүргізілген зерттеу отандық ғылымның халықаралық деңгейдегі зор жетістігі ретінде бағаланып отыр. 🌍
“Отандастар” қоры